اهيم لشوفتــــــــــك

اهيم لشوفتك واتنطر لملكاك

والم دموع عيني وسكته ابجيهن

وأكَلبهن اصورك والعتاب يطول

مدري ابجي عليهن مدري اناغيهن

من يوم الرحت خلفت بيه جروح

من يمرني اسمك مجبر ارثيهن

عاكَد عله جروحي راية العباس

اذا هادن دقيقة بنار اجويهن

واشربهن ملح حد ما ينزفن ليل

وعلى جمر الهجر حفاي امشيهن

صارن شاعرات جروحي من فركَاك

وصفنات الالم صارن قوافيهن

اشكَكَهن اشكَكَ بيه من اغتاض

وانثرهن ملح لو ردت اداويهن

لو صديت الهن مو جروح وروود

ويبارن صفنتي ودمع اباريهن

ومن يمرني شامت مو تكول جروح

جن شايل قباب حروز خافيهن

ويطلبن دواهن وانه عكس الناس

الحنهن وارد بسمك اغنيهن

مو ذله من اكَلك ذني بيه جروح

بس هنه قصايد لازم احجيهن

يتنطرن جيتك وكفن اعله الباب

هذن أجروح الك ما فكرت بيهن